屋企有個長毛二號(又常被稱維園阿伯，唔係，係維園阿哥先啱)，當我每晚坐喺梳化睇新聞時，我都誤以為自己睇緊港台嘅頭條新聞，因為旁邊總有把聲音喺度嬉笑怒罵咁發表政見，又時不時諷刺下時弊，令本來對政治不太感興趣嘅我喺呢位長毛二號耳濡目染下，對各政治議題多咗好多認知，亦都開始關注我哋呢個俾阿爺操控住嘅無能政府，以至近期日日新鮮日日甘嘅選舉新聞。又有時，放工返屋企食飯，想輕輕鬆鬆坐喺度食餐飯睇下新聞，又會無啦啦被問及"你支唔支持雙普選?" "你係咪反對23條立法?""你覺得應唔應該平反六四?"(大佬,我同你一齊去燭光晚會架喎) "你反雙非孕婦來港產子，係咪?" "你覺得係咪應該廢除功能組別?"等等等等......彷彿我變成坐喺《城市論壇》台上嘅親建制派人仕，被台下嘅長毛質問到我口啞啞...（長毛，唔好卒我。比我靜靜地食餐飯)
但其實我覺得咁樣幾好，基本上我唔洗睇電視新聞，又唔洗睇蘋果動新聞，返到屋企自自然然就知道哂每日頭條，仲有埋社評添，慳返唔少時間！唔該哂梁議員！
