我唔係一個容易相處嘅人, 一啲都唔和藹可親, 好硬頸, 好自我, 成日唔聽人講嘢, 又冇耐性, 喜怒形於色, 仲有啲精神分裂。
我有時覺得我來自另一個星球, 一個只有我嘅星球, 或者嗰度有好多個一模一樣嘅我, 習慣自己同另一個自己生活, 思想一致, 完全冇衝突, 好和諧。大概咁先解釋到點解我嚟到地球, 咁難同人相處。
我開始發覺人愈大, 性格就愈剛烈, 大情大性, 任意妄為, 唔多理人感受, 想點就點。咁樣唔得, 我應該控制吓自己嘅情緒, 做個好人, 對人好啲, 唔好咁任性, 應該三思而後行, 應該去釣魚培養耐性, 應該去教堂頌聖詩, 學習容忍同寬恕別人, 仲要食少啲牛肉, 唔好咁暴躁, 再唔係就削髮為尼, 隱居深山, 獨自修行...
其實, 我應該返去我個星球。