生活

一個人住第2年

習慣一個人食飯, 一個人睇戲, 一個人搬傢俬, 一個人打曱甴, 一個人鑽牆, 一個人逛街, 一個人裝燈泡, 一個人半夜走火警(其實仲有其他住客的, 不過那感覺實在太悲涼...)咩都係一個人。話雖如此, 一個人生活並非想像中寂寞, 反而覺得好舒適自在。

好鍾意星期日, 留喺屋企, 攤喺梳化, 乜都唔做, 聽住音樂, 瞓個晏覺。又或者睇住Travel & Living, 睇下Samantha Brown去遨遊世界, 或Jamie Oliver點樣整個gourmet meal, 睇下雜誌, 沖個靚涼, 過一個悠閒寫意嘅下午。
不過, 呢種活動好奢侈, 並唔係每個星期日都可以咁樣度過。

因為星期日, 又係family day, 媽咪又點會放過呢個百年難得一遇嘅好機會。晨咁早打嚟 "仲未起身呀? (早上9點) 係咪同我哋飲茶呀? 今晚留喺屋企食飯啦, 家姐都返嚟呀! 你快啲起身啦..Blah blah blah...(下刪500字)"

我知爸爸媽咪好掛住我, 仲成日話 "衰女!多啲返嚟食飯啦, 等我煮喲好嘢你食!" 話時話, 我都好耐冇食媽咪煮嘅嘢, 今個星期日就返去啦!

我好少喺自己屋企下廚, 大概因為平日太遲放工, 因為煮嘅份量太少, 因為街市關得太早, 因為想保持廚房清潔, 因為太麻煩...其實都係因為太懶。

所以, 屋企附近嘅食肆, 大都食勻了, 好食唔好食都已瞭如指掌!

一個人生活, 所有起居飲食, 日常用品都要一手包辦。所以難免常以一身"光鮮"嘅打扮, 然後左一條廁紙, 右一袋洗頭水可樂即食麵。初頭為免有呢個奇怪嘅情況出現, 我會善用超級市場嘅送貨服務! 後來發現藥房嘅價格比超級市場更化算, 於是就豁出去了, 擰住藥房紅色嘅膠袋周街走, 都見怪不怪。街坊街里, 又有乜所謂~

前陣子, 因為覺得一個人住好孤寂, 於是毅然決定要養寵物!
縱然受到各方好友嘅勸阻, 直覺認為我嘅寵物定會英年早逝, 命喪黃泉, 阿彌陀佛...
可是, 以我嘅性格又點會理會佢哋肆意無知嘅批評, 結果還是買了一隻天竺鼠。好得意好為食, 會咕嚕咕嚕咁叫, 仲會軟軟咁趴喺我身上瞓覺。當然, 佢依家仍然過得好健康愉快啦 :)

短短兩年嘅獨居生活, 慢慢咁建立咗自己一套嘅生活模式, 雖然偶爾會感到寂寞, 不過大部份時間都覺得好舒適, 自由自在, 亦都變得好獨立。

一個人住, 其實都唔錯唷!