星期六 赤柱
天氣都唔錯, 仲有啲海風添...
時間係早上9點
身邊有一群唔係好想見到嘅人, 包括四位已經"朝見口晚見面"嘅老細和同事們, 一位大導, 同尾隨嘅一班shooting crew
冇錯, 星期六跟shoot
真係唔明大導點解要安排喺星期六拍嘢, 更加唔明點解要由晨早9點拍到凌晨3點, 完完全全咁充份利用一個寶貴嘅星期六...好嘢!
清早9點, 當我仲睡眼惺忪時, 我去到第一個location - 赤柱污水處理廠 (導演搵到個好似山洞嘅地方拍攝), 話明"污水處理", 可想而知廠景內充斥住一股極具震撼嘅氣味, 頓時醒神百倍...
逗留咗一個鐘,我深深咁體會一句"smell like shit!!"
雖然..要星期六跟拍片係有啲不忿, 不過, 其實大家都知跟shoot都只不過係行行企企, 睇住部四方果, 食下零食咁, 都唔算辛苦, 只係我身旁兩位老細成日大發偉論, 令大家有啲無所適從...
已經係凌晨一點, 各人都恨不得聽到導演一句"yea, we got the shot!", 快快收隊走人
奈何...拍到臨尾product shot都仲係不斷聽到"唔...嚟多次啦!"
務求拍到最靚, 最緊要, 與客戶認為"最能激發購買慾"嘅靚仔product shot, 卒之...拍咗十幾廿個take...時間已經係凌晨三點
由於整日食得太多魷魚絲呀, 薯片呀, 朱古力呀, Mcdonald's呀, 我嘅腸胃終不勝負荷, 嘰哩咕嚕咁...結果, 未等到導演那句"Cut!!收隊!", 我經已飛的走人了!
不如...星期一sick leave!
