喺陳曾已經第五個年頭, 絕對稱得上老臣子。 我諗如果我再繼續留喺度, 我好快就可以坐入老細房, 同幾位元老日日一齊打warcraft拉cello上ebay, 返1點放6點, 然後去翠亨邨嘆個茶之後再去恤個靚髮!
五年前冇諗過會做到今時今日, 頂多咪做夠兩三年然後入4As, 同其他來去匆匆嘅同事一樣。
我已經唔記得經歷過幾多個朝代, 廣告行人人跳嚟跳去絕對唔係新鮮事, 不過係呢度嘅流失率特別高, 一年換幾個creative, 快得離譜。其實呢個行頭又有幾大? 十隻手指數得哂, 正所謂天下烏鴉一樣黑, 呢度做同嗰度做其實冇咩分別。
又因為有太多無知嘅新丁被騙入局, 每有新血, 老細們又會將佢地"驚天地泣鬼神"嘅偉論一次又一次咁發表。我而家倒轉都識背...
內容大概係:
"當年我地仲喺BBDO個年代真係最好玩, 簡直係癲㗎! 廣告從來都應該以人為本, 香港人梗係要做番啲廣告俾香港人睇, 咁先有共鳴。所以就做咗Sunday一系列嘅經典廣告, 幾大回響! 換轉係依家啲廣告公司, 肯定未過老外大粒佬就已經俾啲廢柴AS(Account Servicing) Ban哂啦....(跟住就順理成章咁講下啲AS有幾廢...)
"嗱, 啲腦筍都未生埋嘅AS最鍾意就寫埋哂D廢Brief, 又要做一大輪research, 跟住又做focus group, 仲要浪廢成team人嘅精力做個美輪美奐嘅powerpoint, 簡直係嘥心機捱眼瞓! 大佬呀, 我地做廣告㗎, 不如留番啲精神度橋啦!" "佢地連咩係好橋屎橋都未識分, 就喺度嘈嘈閉,阻頭阻勢!"
又或者係..
"好橋唔難諗, 最難係要有個好客, 有vision, 有gut屎, 肯試新嘢。大膽啲! 諗得癲啲, 咁先有好嘢出! 年中都不知有幾多好橋俾啲"船頭驚鬼船尾驚賊"嘅客ban哂! 就係因為咁, 出面啲4As最鍾意打飛機...(跟住就順理成章咁講下做飛機稿有幾咁不該, 令到整個廣告行嘅文化有幾敗壞 ...下刪5千字)
其實仲有數之不盡嘅精警言論, 不過如果真係要寫, 我諗都要佔十幾廿版...恕我不能盡錄。不過如果如真係咁有興趣, 你大可嘗試去應徵一下!
至於我, 都做咗五年, 係時候要走, 轉吓環境。喺自己嘅comfort zone留得太耐, 會發覺自己好似冇乜進步咁, 又冇乜幹勁(尤其是我呢啲咁懶嘅人情況更甚) 所以都係要的起心肝改變現狀, 做啲好嘢出嚟!
臨別秋波, 都難免有啲老老土土嘅對話:
老細: 前程似錦啦!
我: 好!承你貴言!
至於我, 都做咗五年, 係時候要走, 轉吓環境。喺自己嘅comfort zone留得太耐, 會發覺自己好似冇乜進步咁, 又冇乜幹勁(尤其是我呢啲咁懶嘅人情況更甚) 所以都係要的起心肝改變現狀, 做啲好嘢出嚟!
臨別秋波, 都難免有啲老老土土嘅對話:
老細: 前程似錦啦!
我: 好!承你貴言!
